DEIYAI MAKIYO MAIDA MAKE MANA

Published on by AGUSMOTE

amo
MAGIYOO KAA DEIYAI WAIYAI KAA MEE TOPAI BAGEIDOO KODAA,
DIMI MA KEGEPA MA KAA EGA KAB. DEIYAI KOU
NIMAI NO KO EDI METEE....?

Agus mote
Ya ugata

Enaa tegee, peu tege, aki kidaa-aki kodaa ebuki makiyaa kaoo?
Aki uwii bokai itaa nako naa edimi makiyaa kaoo?
Enaa makita kaboo nako naa goo komiyaa kaoo?
Akiya makii, akiyaa owa,a aki totaid,a aki umeetaida nako naa mee motimeniyaa kaoo?
Anaitai ma Anukai ma Anogei ma magiyoo nako gaga tiyake ikike-ikiiko Deiyai makii kouya kabupaten motinee tetee!
”Dou ma Gaima tigoo ekowayakee motii ma yaikai ma koyokaoo”


Magiyoo kaa anaita maa, anukai maa, ani amakane, anauwai maa, anibai maa, anogei maa, aniwenekane, deiyai waiyai watiya kaa topai bagee mee ugupuguu, deiyai waiyai makii kou kabupaten awinee kodo egaa-eaga niiedimete kouko, magiyoo nako meipiga tiyakee niiedimeete, mege upeida uminee kipe ko, kou makida kouya make tonawi maki bego, epa begoo tainee kipe ko, ekina munii, bedo/ayam munii, piya iyoo munii, ikane/bonamo munii, bugi e4kowayakee, yatu iyoo wei, nomo iyoo wei, dade ma napo ma iyoo wei, eto ma mapi iyoo weii, akiya aki umii owaa kou epi mige tegayake edage awii, deiyai makii waiyai makii kaa topai bageeidoo kou dimi mana enato awiyake ikoudokou tiga ekowa makiyakee edii mete nako enaoo.

Kouko ekowai beudakaa okeiya kouto naimei-naimei tainee, akikidi bokaidani uwii dani igaidani okeiya agiyoo emogeida make tainee kipeko epa koda pemekaran kabupaten kouko itogaa ko tenaa edimai. Kou pemekran kou edimiyakee, kabupaten deiyai kanipai ko akikidi bokai itaa nako naa ubamakiya koyokaaoo, enano akiya maki kouma, akiya owaa kouma yamoo mee te bage naayayaikeeti aki kidi kii okeiya sampah emigi makeida kuga too uminaa tiyakee okeiya sampah emigita nota kouto nonaa tete. Kagipai aki ipaoo, akiya gaiko pemekaran kabupaten kou niimipaiko megee wadoo umii ta, aniki tonawii maki begoo epa begoo tiyakee bokaita noo kouko dimi dabaa. Ito koda dimi kaa didii kegepa kaa didii kouma aki kidi yege-yegee kouma teki-teki tetidodou. Kou mana kouko woutoo wagii kaa akii kidi-kodo keitai tage dime-dime yokaa toutage mana nako wegape.

Enaa no kabupaten deiyai kou edimi dodou, enaa ma peu ma ko wouto adou page noo. Ito kii nagoo enaa umete nagoo kouya aki petii puga tete kiiko aniya katidokii mana ma makegai mana ma muto wiya dani katinee:
  1. akiya uguwoo ko gene-gene boda-boda ko beu kouko, wouto wagiidaa ko akiyaa uguwoo kodo wege kato tidaa tiyakee akikidi nadi naubai taitage nakitoo aki kidi ipanoo;
  2. akiya totai umeetai makii kodo mee yeyaikiyakee, mege motiyakee wouto wagidaa aki kidi umida beu touda beu tiyakee ewoo boka taitage nakito aki kidii ipanoo;
  3. akiya ekina mege ma ekowaya agiyoudoo kodo adaku tete maida make woutokaa umii tou nako ko gaga tiyake aki kidi igapu kaa ewoo boka titoutage kouto ipanoo. akiya tika kaa koyaa enaa umeetai nako ko igayakee, kaiya tawai-tawai taitage nako too aki ipanoo.
  4. koudani manai mutoudoo nako umina yamake ugai beu tipe. Yamake akikidi dimiyago mana yago kidiki kodokoo, ani naki!!!

Kou mana kamudoo kitipa kouko ipa nayaikai, aki kidi dege mana topii, iyowoyaa mana topii, mee mana kouko akiya manaa kodo koyokaa yaikiyakee, idima topi makiyakee edimete kodo koyokaa ipa too nayaikai. Kou kabupaten kou dimi ma kegepa ma kaa edimipe komaiya enaa ma peu ma nakaa, kota kaa umii tou komaiya aki kidi, aki kodo epi kidikii epi kodokooo magiyoo gaga nakoo mege kodoya kanii pigai kodo no.

Kou yamo kuga ekina mege nako kadokee mei beu yamake, kou yamo kuga bugi/tai, owaa nako aki umidaa aki touda kadoke meibeu yamake, kouyamo kuga akiya enaa makii nako kadoke meibeu yamake......?
Enaa no pemekaran kabupaten deiyai kou edimeeti dodou, ani nakiki beuno, yamake wouto tanidaa doupage...???

Kou woutoo tani/wagidaa deiyai makii kou kabupaten awiyakee akikidi woo dou pukiyai tapage manaa momogii doo ko, kou miyoo ugai manaa dobaiga mana kamu magonaa dani ugape :

  • tikago keneka yapee, keneka wudidaa koyaa pukiyai natetae

  • wiyagoo nakaiya yapee, nakaiya wudidaa koya pukiyai natetae

  • widagoo ukakaiya yapee, ukaka wudidaa koyaa pukiyai natetae

  • uguwoo yapee, uguwoo wudidaa koyaa pukiyai natetae

  • akogei nogei yapee, akogei nogei wudida koyaa pukiyai natetae

  • idima bagee idimaa yapee, idima bagee wudidaa nou mana kii wudidaa kou wudidaa tainegi naki naa doutou.

Yukuma pemekran naa edimipe kodo koyokaa, akina yame kodoko, akinaa dimi yago mana yago kodokoo, ikou manaidoo kou woo dou-dou tainee ko. kou beu kipa ko koyaa wouwee wadoo, wakouwee wadoo, auwee wadoo, yokouwee wadoo nateti, miyo gaaaaa ki koyaaaaa umii tou tege kidiyaa.

Ikou manaidoo kou idima, meena kaako dimaiko beu, aki kidaa dimi ma kegepa maa kaa naa ediimeege. Yape goomakai akikidaa, edi uwo, ukiyaa goo makai aki kidaa, ibo eniyaa tekii eniyaa goo maki aki kidaa kodono koyaa pukiyai nateti.

Tegee dou daiga ko, akiya bageidoo didi beu kodo woo pakumidaa to tipai, aki kidaa yape goo makipe kidikii. Maida make ko gaaduwai tegaduwai mana kamuu kou. Yame kidikiyoka- yameekai, petii kidikiyoka peti kai kou mana kouto.

Enaa no Epabeu no

Aki kidaa, aki kodaa dimi puki kaa kegepa puki kaa; didi kabu, gaga kabu, igapu kabu, yape kabu, edi kabu, uwo kabu ebuki make teeti, woutoo tanii daa ko koyaa umeete.

Koyaa kiyokao Anogei!!!

Published on BAHASA MEE

To be informed of the latest articles, subscribe:
Comment on this post